دوکتور قاسملوو، ڕێبەرێک نەبوو کە تەنیا لە چوارچێوەی جوگرافیای وڵاتەکەی خۆیدا ناسرابێ، قاسملوو بوو کە دۆزی ڕەوای کوردی بە نێونەتەوەیی کرد و بوو بە پردی پێوەندیی نێوان گەلی کورد و وڵاتانی ئورووپایی و کەسایەتییە جیهانییەکان، بێگومان ئەگەر قاسملوو نەبایە ئێستاشی لەگەڵ بێ زۆر کەس نەیاندەزانی پرسی کورد چییە!

دوکتور قاسملوو ڕێبەرێکی کاریزماتیک، خوێندەوار، بلیمەت و ئازا بوو، لە ئورووپا دیپلۆماتێکی بە تەواوی مانا بوو، لە کوردستان ڕێبەرێکی بێوێنە بوو کە لە سەنگەری بەرخوداندا لەگەڵ پێشمەرگە دەحەسایەوە و بە بزەی سەر لێوی هیوا بە دوای ڕۆژی ڕووناکی دەخستە دڵی هەر تێکۆشەرێکی ئەم ئاو و خاکەوە.

ئەوەی کە پێویستە وەکوو کەتوارێکی گرینگ ئاماژەی پێ بکرێت ئەمەیە کە پاش ٣٣ ساڵ لە تێرۆری قاسملووی نەمر، ئێستاش هەر لە دڵی ڕێبوارانی ڕێگا پڕ سەرەوەرییەکەیدا دەژیت و قاسملوو هەر زیندووە!

ڕێبازی قاسملوو هەوێنی بەردەوامی گەلێکە لە خەبات و تێکۆشان بۆ گەیشتن بە مافە نەتەوەییەکانیان.

ئەگەرچی ڕێژیمی ئیسلامیی پێی وابوو بە تێرۆرکردنی ئەم مەزنەڕێبەرە دەتوانێ خەباتی گەلی کورد تووشی داڕمان بکات، بەڵام بەپێچەوانە، هزر و ئەندێشەی قاسملوو ئێستاش چرای ڕووناکیدەری ڕێگای ڕێبوارانییەتی.

پاش زیاتر لە سێ دەیە لە شەهیدبوونی دوکتور قاسملوو، نەوەیەک جڵەوی خەباتەکەیان بە دەستەوە گرتووە کە لە نیزیکەوە قاسملوویان نەبینیوە، بەڵام ئەندێشە و ڕێبازی قاسملوویان کردووەتە چراوگی خەباتەکەیان و بە درێژەدانی ڕێگاکەی وتە بەنرخەکەی خۆی بەجێ دێنن کە دەفەرمێ: “گەلێک ئازادی بوێ، دەبێ نرخی ئەو ئازادییەش بدا”.

قاسملوو ئەمڕۆ لە ماڵی هەر کوردێکی ئەم نیشتمانەدا جوانترین تابلۆی ژیانە، بەنرخترین کتێبی کتێبخانەیە، جوانترین سروودێکە کە منداڵان دەیڵێنەوە، ئازیزترین ڕێبەرە کە ڕێگاکەی بێ ڕێبوار نا‌هێڵنەوە، بۆیە ئەوەی کە پێی وابوو بە شەهیدکردنی قاسملوو، خەباتەکە دەوەستێنێ، ئەمڕۆ دەبینێ کە پۆل پۆل کیژان و کوڕانی ئەم نیشتمانە، بە فێربوون لە وانەی خۆنەویستی و ئازایەتیی قاسملووی ڕێبەرە کە پێ دەنێنە نێو گۆڕەپانی خەباتەوە و پێش هەموو کەسێک بەڵێن لەگەڵ ئەم ڕێبەرە مەزنە دووپات دەکەنەوە.

تا لاوێکی ئەم نیشتمانە مابێ و چەکی پارێزگاری لە خاک و نیشتمان لە شان بکات، تا ئەو کاتەی منداڵی ئەم گەلە، سروودی قاسملوو ئەی وانەبێژی سەرچیاکانی وەتەن بڵێتەوە، تا کاتێک کە وێنەی قاسملوو جوانترین و بەنرخترین وێنەی نێو ماڵی کوردان بێت، قاسملوو زیندووە و ڕێبازەکەشی بەردەوامە.

٢٢ی پووشپەڕی هەموو ساڵێک، دەرفەتێکە بۆ ئەوەی کە تێکۆشەرانی ڕێبازی کوردایەتی بەڵێن لەگەڵ شەهیدان و بەتایبەتیش شەهیدانی ڤییەن نوێ بکەنەوە کە تا گەیشتن بەو ئامانجانەی کە ئەوان لە پێناویدا گیانیان بەخت کرد لە تێکۆشان و خەبات نەوەستن.

قاسملوو لە دڵی هەر کوردێکدا زیندوویە چونکە ڕێبوارانی ڕێگاکەی سوورن لە سەر باوەڕەکانی، بێگومان تاکوو بیر و هزری قاسملوو هەبێ، ئەم کوردستانە خەباتکاری لێ نابڕێت و درێژە بە ڕێبازی پەیغەمبەری ئاشتی دەدەن.